Yangi shag'al ishlab chiqarish zavodi foydalanishga topshirildi

GRANIT AJ uchun yangi shag‘al ishlab chiqarish zavodi ishga tushirildi

DORKOMPLEKSNAB SERVIS MChJ ishchi-xodimlari tomonidan Samarqand viloyati Paxtachi tumanidagi ishlab chiqarish maydonida GRANIT AJ uchun yangi shag‘al ishlab chiqarish zavodi qurilib, foydalanishga topshirildi.

Mazkur loyiha DORKOMPLEKSNAB SERVIS MChJ va GRANIT AJning hamkorlikdagi mehnati natijasida amalga oshirildi. Zavodning qurilishi va ishga tushirilishida har ikki korxonaning mutaxassislari va ishchi-xodimlari faol ishtirok etdi.

Yangi ishlab chiqarish majmuasi to‘liq texnologik jarayonni o‘z ichiga oladi. Karyerdan keltirilgan tosh avval birlamchi jag‘li maydalagichda yiriklashtiriladi, so‘ng CS440 konusli maydalagich orqali ikkinchi bosqich maydalashdan o‘tkaziladi. Keyinchalik tayyor mahsulot vibroelaklar yordamida belgilangan fraksiyalarga ajratilib, konveyer liniyalari orqali temir yo‘l vagonlariga yuklanadi.

Zavodning ishga tushirilishi GRANIT AJning temir yo‘l balasti va qurilish sohasi uchun zarur inert materiallar ishlab chiqarish imkoniyatlarini kengaytirish, mahsulot sifatini barqarorlashtirish hamda buyurtmachilarga yetkazib berish jarayonlarini yanada samarali tashkil etishga xizmat qiladi.

Loyihani amalga oshirish, zavodni qurish, texnologik uskunalarni o‘rnatish va ishga tushirish jarayonlarida ishtirok etgan DORKOMPLEKSNAB SERVIS MChJ hamda GRANIT AJning barcha mutaxassislari va ishchi-xodimlariga minnatdorchilik bildiramiz.

Bu loyiha ikki korxonaning hamkorligi, tajribasi va jamoaviy mehnatining amaliy natijasidir.